Hebrews 13

Naninidi 'waidiega Yaubada i na sosoana faifaida.

1Ma emiavo 'wa na vevenuakalikali fai matatabumi Keliso yana 'Aila'a. 2Kebu nuami i na fani 'wa na nuanuani bega tomotoganidi kebu 'wa da 'isa'inanadiga ma yami sosoana 'wa na goledi i na maia yami vanuge. Tomotoga 'ifwaidi bani'odi i munega anelose kebu i da 'isa'inanadiga siwe i goledi. 3'Ai'edi 'wa da miamiani vanuga 'eba yogona 'waineye nuanuami emiavo i da nuanuanimi i da fogefogemi, bega egavo vanuga 'eba yogona 'waineye i miamianiga 'wa na nuanuanidi 'wa da vo ma fuemie 'wa da luku. Wata bani'odi egavo vita i veveluagadiga tomotoga 'ifwaidi 'waidiega 'wa na nuanuanidi 'wa da vo 'omi wata vita 'wa da veveluagadi.

 4I lubwaineda matatabuda nagi ta na ve'ililibuyeni. Iavetami kebu yami vevinevo 'wa na bailedi 'wa na lu'avo'avovo, wata bani'odi 'omi vevine yami lalamogavo 'wa na veve'ililibuyedi. Egavo taunidi i tauyedi bunu 'ana nuanua sakoidi wata ve'avula-'avo'avovo 'waidie Yaubada i na veimeyedi vematavuloga faifaina.

 5Taunimi 'wa na 'i'isave'avinimi bega mani 'ana nuakalikali kebu i na vebwaika 'waimie. Ava'ai 'akonadi 'waimie i 'eno'enoviga, siwe 'asa'aiana 'ami fata. Kebu fuedi faifaidi 'wa na nuanua fai 'akonadi Yaubada i vo,

Kebu tamu tutuya a na bailemiga,

Kebu tamu sai'afo a na 'iawe-lovemiga.”

 6Fai kebu i na 'iawe-lovedaga kebu ta na kololo 'alo ta na venuanaluga ta na vonavonamo ta na vo,

'Auvea 'aku To'aivaita,

Kebu a na kolologa.

Naninidi sakoidi tomotoga i na 'idewadiga 'waikuye, kebu faifaidi a na nuanua.”

  • S1 Ion 13:34S2 1 Fit 4:9S3 Mad 25:36
  • S5 Ios 1:5 1 Tim 6:8-10S6 Same 118:6

Yami to'edakumetavo bonadi 'wa na nogaidi.

7Yami to'edakumetavo nagami, 'wa na nuanuanidi, kumanidiavo Yaubada yana Vona i lu'ivona 'waimie. Basenadi yadi sauluva 'atumaidi wata yadi folova 'waidiega nani fuedi 'atumaidi i souyedi, naninidi 'wa na nuanuanidi wata yadi vetumagana 'wa na vetutuyamedi. 8Iesu Keliso kebu i na vetuli, bogi, 'asiau, wata tutuya matatabuna i na nagoga siwe 'asa'aiana 'ana 'isa'isanina.

 9Taunimi 'wa na 'i'isave'avinimi i na nunago ve-vekavekali tulina tulina nuami i na 'ewadi i na vuyoyemi Yaubada yana 'eda'eda tonovina 'wainega. Yada nuanua Yaubada yana nuakalikali 'wainega i na kiavetoketokediga, i lubwaineni, we'e veimea 'adi ve'ililibu 'ani'ani faifaidi 'waidiega kebu ta na vetoketokega. Egavo veimeanidi i veve'ililibuyediga kebu 'aivaita i na veluagai 'waidiega.

 10'Ida tovetumaganavo ma yada 'eba velomu, 'ai lagalagana bei Keliso i wafa siwe 'asa'aiana yada 'eba velomu. Egavo bola i folofolova vanuga 'eba velu'ui tuatuaina 'waineye kebu 'adi fata 'aivaita i na veluagai yada 'eba velomunina 'wainega. 11Me Diu yadi tovelomu bwaikina 'aisaya dayagi'avadi i lukulukuvedi Tutudaba Tabutabuotogina nageneye i 'a'anivelenedi Yaubada 'waineye tomotoga yadi sakona 'adi nuatavuna faifaina. We'e 'aisayadi i nunawedi mwalilige bei i kabukabunidi. 12Begaidi wata Iesu i wafa mwalilige bega tomotoga i 'ivevunavunagidi yadi sakona 'waidiega taunina dayagina 'wainega. 13Fai i 'ivevunavunagida, sauluva tuatuaidi ta na bailedi 'wa da vo ta da nunagoi 'waineye mwalilige, bunumayaga wata saidibi ta na veluagai faifaina, taunina bani'odi i veluagai 'ai lagalagana 'waineye. 14Vitanidi ta na veluagadiga faifaina, kebu faifaidi ta na nuanua fai 'ida kebu tamu yada 'atamana miamia-vagaina i da 'eno'enoga fwayefwayeye, bola ta lalauala Yaubada yana 'atamana faifaina, 'atamananina 'awaie i na souyeni.

 15Begaidi Iesu 'wainega Yaubada ta na subisubiai kebu ta na 'ailove, yada subianina siwe 'asa'aiana yada 'anivelena-maimaiga 'waineye. Bonadega ta lulu'ivona faifaina bega subianina Yaubada 'waineye bonada vuagina.

 16Kebu nuami i na fani, tutuya fuedi 'wa na vevesauluva 'atumaina wata ma emiavo 'wa na veve'ivaivaita. Sauluvanidi siwe 'asa'aiana yami 'anivelena-maimaiga Yaubada 'waineye, faifaidi i sososoana.

 17Yami to'edakumetavo 'wa na vematayakeyakedi wata taunimi 'wa na tauyemi yadi veimea 'waidie. Tutuya fuedi i 'i'isave'avinimi kebu tamu tutuya i da 'ailove fai 'awaie yadi folovanina faifaina i na lu'ivona Yaubada 'waineye bega i na veimea tutula faifaina. 'Wa na vematayakeyakediga ma yadi sosoana i na folofolova, we'e 'ai'edi kebu, ma yadi nuavita i na folofolova siwe 'wainega kebu 'aivaita 'wa na veluagai.

 18Nuanuaku 'wa na vevelu'ui faifaiku. 'Aku vebae 'waineye a lutonovi yaku folova wata yaku sauluva matatabuna tonovi'avadi, nuanuaku bani'odi i na 'eno-vagata. 19Nuanuaku bwaikina 'wa na toke 'wa na vevelu'ui faifaiku bega Yaubada i na vetune-matayo'oku a na wai 'waimie.

  • S8 Ve 1:17-18S9 Lom 14:17 1 Kol 8:8S11 Vei 16:27
  • S12 Ion 19:17S13 1 Fit 4:1,14S14 Ibu 11:16
  • S15 Same 50:14,23S16 Fil 4:18S17 1 Tes 5:12
  • S19 Lom 15:30

Velu'ui tolu'iawawa faifaidi.

20A vevelu'ui faifaimi nuanuaku Yaubada, kumanina mia 'atumaina wata nuanua bikana 'adi to'anivelena, wata 'ada Toveimea Iesu Keliso 'ana tosivetovoi, i na kiavetoketokemi bega 'ami fata yana nuanua 'wa na 'i'idewadi. Yana wafa 'wainega Iesu i veto'isave'avina bwaikina, bega 'ida yana sifi i 'i'isave'avinida, wata yana wafanina 'waineye dayagina i ilolo, 'wainega Yaubada yana Veakutagona 'Ivauna wata miamia-vagaina i souyeni. Bega nuanuaku Iesu Keliso 'wainega Yaubada i na 'idewada nika yada sauluva matatabuna faifaidi i na sosoana. Iesu ma 'ana subia wata ma yana 'ai'aiwabu miamia-vagaina, kebu i na 'a'avaga. Vona mogitana, yaku nuanua bani'odi.

Vona 'ana 'eba ve'a'ava.

22Ekwavo, nuanuaku bwaikina 'wa na tokemaigemi, yaku velu'ase'ase de'e 'wa na nogai fai leta de'e a kilumiga faifaimi kebu manamanawenaga. 23Nuanuaku a na vonemi 'wa na 'asetai, iada Timoti 'akonadi i souyeni vanuga 'eba yogona 'wainega. 'Ai'edi i na le'wa-matayo'oga, taiadi 'a na wai 'a na fogemi.

 24Yami to'edakumetavo 'waidie yaku vekaiwa 'wa na lu'ivona wata Yaubada yana tomotoga matatabudi 'waidie. Edavo 'awalawa Itali 'wainega yadi vekaiwa i vetunei 'waimie.

 25Nuanuaku Yaubada ma yana nuakalikali i na vevesauluva 'atumaina 'waimie.

  • S20 Ion 10:11,18 1 Tes 5:23S21 1 Fit 5:10 Fil 2:13
'Asa'aiana bani'odi.
Copyright information for YML